В лѣто 6773-е. Побишася Литва межи собою[1] нѣкиа ради нужа, блаженый же князь Домантъ съ друженою своею и съ всѣм родомъ своимъ оставль отечьство свое, землю Литовскую, и прибѣже в Плѣсков.[2] Си бысть князь Домонт от племени литовского,[3] прьвѣе имѣа ко идоломъ служение[4] по отцю преданию, егда Богь восхотѣ избрати собѣ люди новы, и вдохну в онь благодать Святого Духа, и възбнувся, яко от сна, от идолского служениа и помысли своими бояры креститися во имя Отца и Сына и Святого Духа. И крещен бысть въ соборной церкви, въ святѣй Троици,[5] и наречено бысть имя ему въ святомъ крещении Тимофѣй. И бысть радость велика во Плескове, и посадиша его мужи псковичи на княжение въ градѣ Псковѣ.

Рака с мощами св. кн. Довмонта.

По неколицѣхъ днехъ помысли ехати съ мужи псковичи, съ 3-ми девяносты,[6] и плени землю Литовскую, и отечьство свое повоева, и княгиню Герденевую[7] полони и дѣти ея, и все княжение его повоева, и възратися съ множеством полона ко граду Плескову. Перебродився Двину, и отъеха за 5 верстъ, и ста шатры на бору чистѣ, а стражи постави на рѣцѣ на Двинѣ Давыда Якуновича, внука Жаврова, с Лувою с Литовникомъ. Двѣ же девяностѣ мужь отпровади с полономъ, а во едином девяносте сам ся оста, жда по собѣ погони.

Герденю же съ своими князи дома не бывшю, и приехаше в домы своя, аже домовѣ их и земля их вся пленена. Ополчився Гордений и Гойтортъ и Люмби и Югайло и прочии князи, в семисотъ погнаша в слѣд Домонта, хотяще его руками яти и лютой смерти продати, а мужи псковичи мечи иссѣчи, и пребродившеся Двину рѣку и сташа на брезѣ. И стражи же, видѣвше рать велику, пригнавше, поведавше Домонту: рать перебродилася Двину. Домонтъ же рече Давыду и Лувѣ: «Помози вама Богъ и святаа Троица, оже еста устерегла рать велику, полезьта доловъ». И рече Давыдъ и Лува: «Не лезова доловъ, хотя животъ свой дати на славѣ и кровь свою пролити с мужи съ псковичи за святую Троицу и за вся церкви святыа. А ты, господине княже, поеди борзо с мужи съ псковичи на поганую Литву». Домонт же рече псковичемъ: «Братьа мужи псковичи, кто старъ, то отець, а кто млад, той братъ! Слышалъ есмь мужество ваше во всѣх странах, се же, братья, нам предлежитъ животъ и смерть. Братья мужи псковичи, потягнѣте за святую Троицу и за святыа церкви, за свое отечьство!»

Тогда же бѣ приспѣлъ день великого и славнаго воеводы, мученика Христова Леонтиа,[8] и рече Тимофѣй князь: «Святаа Троица, и святый великий воевода Леонтий, и благовѣрный княже Всеволоде,[9] помози намъ в час сий на супротивныя врагы». И ехав, князь Домонтъ с мужи псковичи Божиею силою и святаго Христова мученика Леонтиа одиномъ девяностомъ 7 сот побѣди. Тогда же убиенъ бысть князь великий литовский Гойтортъ, и инѣхъ князей много избиша; а инаа Литва въ Двине истопоша, а инѣхъ Двина изверже 70 их на островъ Гоидовъ, а инии на прочаа островы извержени быша, а инии вниз по Двине поплыша. Тогда же убиенъ бысть Онтонъ един псковитинъ, сынъ Лочков, брат Смолигов, а инии вси без вреда съхранени быша молитвою святого Христова мученика Леонтиа. И възвратишася с радостию великою ко Пскову граду съ многою користию, и бысть радость и веселие велико въ градѣ во Пскове о пособии святыа Троица, и славнаго великого Христова мученика Леонтиа, и благовѣрнаго князя Всеволода, ихъ молитвами на супостатыа побѣда.

И паки же по томъ времени, в лѣто 6775-е, великий князь Дмитрий Олександровичь... съ зятемъ своимъ с Домонтомъ[10] и с мужи с новогородци и со псковичи и иде к Раковору,[11] и бысть сѣча велика[12] с погаными немци на полѣ чистѣ, и помощию святыа Софиа[13] Премудрости божиа и святыа Троици немецкиа полкы побѣдиша февраля 18 суботу сыропусную.[14] И прошед горы непроходимаа, и иде на вируяны,[15] и плени землю их и до моря, и повоева Поморье,[16] и паки возвратився, и исполни землю свою множеством полона. И славна бысть вся земля ею во всехъ странах страхом грозы храборства великого князя Дмитрея, и зятя его Домонта, и мужь ею новогородцовъ и псковичь.

И по томъ по неколицех днехъ останок собравше поганое латины,[17] и пришед тайно, и взяша с украины нѣколико псковскых сѣлъ, и възвратишася вскорѣ. И боголюбивы же князь Домонтъ не стерпѣ обидимѣ быти земли и дому святыа Троица от нападениа поганыхъ немець, выехавъ в погоню с малою дружиною в пяти насадах[18] с шестьюдесятью мужь псковичь, Божиею силою 8 сотъ немѣц побѣди на рѣцѣ на Мироповнѣ,[19] а два насада бѣжаше в ыныа островы. Боголюбивый же князь Домонтъ, ехав и зажже островъ, и пожже ихъ под травою, а инии побѣгоша, а власи их зажжени горятъ, а иных иссѣче, а инии истопоша в водѣ пособием святыа Троици, и славнаго великого воина Георгиа,[20] и молитвою благовѣрнаго князя Всеволода, месяца априля в 23 день, на память святого славнаго мученика Христова Георгиа. И възвратишася с радостию великою въ град во Псковъ, и бысть радость и веселие въ граде во Пскове о пособии Святыа Троица и святого воина великого Христова мученика Георгиа.

Слышав же местеръ земля Ризскиа[21] мужство Домонтово, ополчився в силѣ тяжцѣ без Бога, и прииде ко Пскову в корабляхъ и в лодьях и на конехъ, и с порокы, хотя плѣнити домъ Святыа Троица, а князя Домонта руками яти, а мужъ псковичь мечи иссѣчи, а иныа люди плесковскыа в работу ввѣсти. Слышав же то Домонтъ, ополчающася люди без ума во множствѣ силы, без Бога, и вниде въ церковь Святыа Троица и, положивъ мечь свой пред олтаремъ Господнимь, пад, моляся много с плачемъ, сице глаголя: «Господи Боже силъ, мы, людие твои и овца пажити твоея, имя твое призываемъ, призри на кроткиа и смиренныа възвыши, и гордыхъ высокиа мысли низложи, да не опустиеть пажить овць твоих».[22] И взем же игуменъ Сидоръ[23] мечь, и всь иерѣйский чинъ, препоясавше мечемъ, и благословивша и отпустиша. Домонт же въ множествѣ ярости мужства своего, не дождавъ полковъ новъгородцких, с малою дружиною с мужи съ псковичи выехавъ, Божиею силою побѣди и изби полки ихъ, самого же местера раниша по лицю. Они же трупьа своя многи учаны[24] накладоша, вѣзоша в землю свою, а останокъ ихъ устрѣмиша на бѣгъ, месяца июня в 8 день, на память святого мученика Федора Стратилата принесению мощей.

И паки же по временех княжениа его начаша поганая латына силу дѣати на псковичехъ нападениемъ и работою. Боголюбивый же князь Тимофѣй не стерпѣ обидимъ быти, ехавъ с мужи съ псковичи, и плѣни землю и грады их пожже.

И потомъ по малѣ времѣни бысть знамение в лунѣ, месяца септября. Тоа же зимы грѣх ради наших изгониша немци изгонною ратью посад у Пскова, в лѣто 6807-е, месяца марта въ 4 день, на память святого мученика Павла и Ульаны, и избиша игумены. Тогда убиенъ бысть Василей, игуменъ святого Спаса,[25] Иосифъ прозвутеръ, Иасаф, игуменъ святѣй Богородици Снятной горѣ,[26] и с ними 17 мнихъ, и черньца, и черници, и убогыа, и жены, и малыа дѣтки, а мужь Богъ ублюдѣ. Въ утрий же день погании немци оступиша град Псков, хотяще его плѣнити. Боголюбивый же князь Тимофей не стерпѣ дождати мужь своихъ болшея рати и выехал с малою дружиною с мужи съ псковичи и с Ываномъ с Дорогомиловичем[27] и сь его дружиною, противо имъ вполчився. Помощью Святыа Троица у святого Петра и Павла на бѣрезѣ[28] удари на нихъ; и бысть сѣча зла, якоже николиже не бывала у Пскова, и раниша самого мендѣря[29] по главѣ, а вельневици,[30] изъимавѣ, посла к великому князю Андрѣеви,[31] а прочии вскорѣ повергъша оружиа и устрѣмишася на бѣгъ страхомъ грозы храборства Домонтова и мужъ его псковичь.

Тогда же бѣаше и моръ золъ на людех.

Сей же бѣ князь не одинем храборъством показанъ бысть от Бога, но и боголюбець показася, в мирѣ приветливъ, и церкви украшаа, и попы и нищаа любя, и вся праздники честно проводя, и попы и чернца кормля, и милостыню даа и сиротамъ и вдовицамъ. Якоже рече Исайя пророкъ: «Князь благъ въ странѣ, увѣтлив, боголюбивъ, страннолюбецъ, кротокъ, смѣренъ, по образу Божию; Богъ бо мира не аггеломъ любить, но человѣкомъ щедря си ущедряеть и показуеть милость свою на мирѣ».[32]

И прославися имя князей нашихъ во всѣх странахъ, и бысть имя их грозно на ратехъ, и быша князи княземъ и воеводы воеводамъ, и бысть грозенъ гласъ ихъ пред полкы, аки труба звѣнящи, и бысть побѣжаа и не бѣ побѣдими, якоже бѣ и Акрита,[33] единъ побѣжая полки в крѣпости силы своеа. Такоже и великий князь Александръ[34] и Дмитрей сынъ его с своими бояры, и с новогородци, и съ зятем своимъ с Домонтомъ и сь его мужи с плесковичи побѣжаа страны поганыа Немець, Литву, Чюдь, Корелу. То единаго ли ради Езекѣя съхраненъ бысть Иерусалимъ от плѣнениа Синахиримля, царя Асурска.[35] Паки же и великимъ княземъ Александром, и сыномъ его Дмитреемъ, и зятемъ его Домонтомъ спасенъ бысть град Новгород и Псковъ от нападениа поганыхъ немѣць.

И по томъ времени мало здравъ бывъ благовѣрный князь Тимофей и нача болѣти, и в той болѣзни и преставися к Богу в жизнь вѣчную, месяца майя в 20, на память святого мученика Фалѣлеа. А проводиша его все поповство, и игумены, и чернцы, и все множество людей плакахуся его, и тако положиша и в святѣй Троици с похвалами, и пѣсньми, и пѣнии духовными. Бысть же тогда жалость велика въ Плѣсковѣ мужемъ, и женам, и малымъ дѣтемъ по добром господине благовѣрномъ князи Тимофѣи, и много бо дне пострада за домъ Святыа Троица и за мужей за псковичь стояниемъ дому Святыа Троица.